ಲಘುನ್ಯಾಸದ ಬೆಳಕಿನಲ್ಲಿ ಶಿವದರ್ಶನ ೩—ಪ್ರಾರ್ಥನಾಲ-ಸ್ತುತಿ

೩) ಪ್ರಾರ್ಥನಾ-ಮಙ್ಗಲ-ಸ್ತುತಿಃ

(ಅನುಷ್ಟುಪ್ ವೃತ್ತಮ್)

ವನ್ದೇ ಗಣಪತಿಂ ದೇವಂ ಕವೀನಾಂ ಕವಿಮುತ್ತಮಮ್ |

ಜ್ಯೇಷ್ಠರಾಜಂ ಶಂಭುಸೂನುಂ ವನ್ದೇ ತಂ ಬ್ರಹ್ಮಣಸ್ಪತಿಮ್ || ೧ ||

ಆದಿಪೂಜ್ಯಂ ಸರ್ವವನ್ದ್ಯಂ ವರದಂ ವಿಘ್ನನಾಶಕಮ್ |

ಸಿದ್ಧಿಬುದ್ಧಿಪ್ರದಂ ಮೂಲಾಧಾರಸ್ಥಿತಂ ವಿನಾಯಕಮ್ || ೨ ||

ವಿಘ್ನರಾಜಮುಮಾಪುತ್ರಂ ವನ್ದೇ ಷಣ್ಮುಖಸೋದರಮ್ |

ಅನ್ತರಾಯನಿವೃತ್ಯರ್ಥಂ ಗಜಾನನಂ ಸಮಾಶ್ರಯೇ || ೩ ||

ಗುರುರ್ಬ್ರಹ್ಮಾ ಗುರುರ್ವಿಷ್ಣುರ್ಗುರುರ್ದೇವೋ ಮಹೇಶ್ವರಃ |

ಗುರುಃ ಸಾಕ್ಷಾತ್ ಪರಂಬ್ರಹ್ಮ ತಸ್ಮೈ ಶ್ರೀಗುರವೇ ನಮಃ ||೪ ||

ಅಜ್ಞಾನತಿಮಿರಾನ್ಧಸ್ಯ ಜ್ಞಾನಾಞ್ಜನಶಲಾಕಯಾ |

ಚಕ್ಷುರುನ್ಮೀಲಿತಂ ಯೇನ ತಸ್ಮೈ ಶ್ರೀಗುರವೇ ನಮಃ || ೫ ||

ಅಖಣ್ಡಮಣ್ಡಲಾಕಾರಂ ವ್ಯಾಪ್ತಂ ಯೇನ ಚರಾಚರಮ್ |

ತತ್ಪದಂ ದರ್ಶಿತಂ ಯೇನ ತಸ್ಮೈ ಶ್ರೀಗುರವೇ ನಮಃ || ೬ ||

ದಿಕ್ಕಾಲಾದ್ಯನವಚ್ಛಿನ್ನಾನನ್ತಚಿನ್ಮಾತ್ರಮೂರ್ತಯೇ |

ಸ್ವಾನುಭೂತ್ಯೇಕಮಾನಾಯ ನಮಃ ಶಾನ್ತಾಯ ತೇಜಸೇ ||೭ ||

(ಸುಭಾ.ರ.ಭಾ.೧.ಪರಬ್ರಹ್ಮಸ್ತುತಿ.ಶ್ಲೋ.೨)

ಅನನ್ತನಾಮಧೇಯಾಯ ಸರ್ವಾಕಾರವಿಧಾಯಿನೇ |

ಸಮಸ್ತಮನ್ತ್ರವಾಚ್ಯಾಯ ವಿಶ್ವೈಕಪತಯೇ ನಮಃ ||೮ ||

( ಸುಭಾ.ರ.ಭಾ.೧.ಪ.ಸ್ತುತಿ.ಶ್ಲೋ.೩)

ಪರಬ್ರಹ್ಮ ಪರಂಧಾಮ ಪರಾತ್ಪರಂ ಪರೇಶ್ವರಮ್ |

ಸಚ್ಚಿದಾನನ್ದರೂಪಂ ತಮರೂಪಂ ನಿರ್ಗುಣಂ ಭಜೇ || ೯ ||

ವಿಷ್ಣುಂ ನಾರಾಯಣಂ ವನ್ದೇ ರಾಮಂ ಕೃಷ್ಣಂ ತ್ರಿವಿಕ್ರಮಮ್ |

ವಾಮನಂ ಮಾಧವಂ ಮತ್ಸ್ಯಂ ಹಯಗ್ರೀವಂ ಜಗತ್ಪತಿಮ್ || ೧೦ ||

ಶ್ರೀಹರಿಂ ಕೇಶವಂ ಕೂರ್ಮಂ ಶ್ರೀನೃಸಿಂಹಂ ತಥಾಗತಮ್ |

ವರಾಹಂ ಯಜ್ಞರೂಪಂ ಕಂ ಭಾರ್ಗವಂ ಕಲ್ಕಿರೂಪಿಣಮ್ ||೧೧ ||

ಪ್ರಪದ್ಯೇ ಸರ್ವಲೋಕೇಶಂ ಲೋಕಪಾಲನತತ್ಪರಮ್ |

ಲೋಕೈಕನಾಯಕಂ ದಿವ್ಯಂ ದೀನನಾಥಂ ದಿನೇಶ್ವರಮ್ || ೧೨ ||

ಬ್ರಹ್ಮಾಣಂ ವೇಧಸಂ ವಾಣೀವಲ್ಲಭಂ ಕರುಣಾಕರಮ್ |

ಆದಿಕವಿಂ ವಿಧಿಂ ವೇದಪುರಾಣಾದಿಪ್ರಕಾಶಕಮ್ || ೧೩ ||

ಸೃಷ್ಟಿಕರ್ತಾರಮೀಡೇऽಹಂ ವಿಧಾತಾರಂ ಚತುರ್ಮುಖಮ್ |

ವಾಗೀಶಂ ವಿಷ್ಣುಮಾಯಾಭ್ಯಾಂ ಜಾತಮಾದಿಪ್ರಜಾಪತಿಮ್ || ೧೪ ||

ಬ್ರಹ್ಮದಣ್ಢಧರಂ ದೇವಮಕ್ಷಮಾಲಾವಿಭೂಷಿತಮ್ |

ಕಮಣ್ಡಲುಧೃತಂ ಸತ್ಯಲೋಕವಾಸಂ ನಮಾಮ್ಯಹಮ್ || ೧೫ ||

ಶಿವಂ ರುದ್ರಂ ಮಹಾದೇವಂ ಶಮ್ಭುಮೀಶಂ ಭವಂ ಹರಮ್ |

ಶಙ್ಕರಂ ಗಿರಿಜಾನಾಥಂ ಕೈಲಾಸವಾಸಿನಂ ಪರಮ್ || ೧೬ ||

ಶ್ಮಶಾನಸ್ಥಂ ಭೂತನಾಥಂ ಪ್ರಮಥಾಧಿಪಮೀಶ್ವರಮ್ |

ಈಶಾನಂ ಸುನ್ದರಂ ಸತ್ಯಂ ಸತೀಶಂ ಸರ್ವಸೇವಿತಮ್ || ೧೭ ||

ಭಸ್ಮರುದ್ರಾಕ್ಷಭೂಷಂ ತಂ ರುಂಡಮಾಲಾಧರಂ ಪ್ರಭುಮ್ |

ಪಿನಾಕಿನಂ ಸದಾ ವನ್ದೇ ಗಙ್ಗಾಧರಂ ತ್ರಿಶೂಲಿನಮ್ || ೧೮ ||

ಆದಿಶಕ್ತಿಂ ಸಿಂಹವಾಹಾಂ ಶುಂಭಾಂತಕೀಂ ಗದಾಧರೀಮ್ |

ಮಹಾಮಾಯಾಂ ಸದಾವನ್ದ್ಯಾಂ ಜಗನ್ಮಾತರಮೀಶ್ವರೀಮ್ || ೧೯ ||

ದುರ್ಗಾದೇವೀಂ ಲೋಹಿತಾಕ್ಷೀಂ ವಾರುಣೀಮದವಿಹ್ವಲಾಮ್ |

ಕದಮ್ಬವನವಾಸಾಂ ತಾಂ ಮಹಿಷಾಸುರಮರ್ದಿನೀಮ್ || ೨೦ ||

ಶಾಙ್ಕರೀಂ ಶಾಮ್ಭವೀಂ ರೌದ್ರೀಂ ಕಾಲೀಂ ಕಾಲಕಲಾತ್ಮಿಕಾಮ್ |

ಕಾಲರಾತ್ರಿಸ್ವರೂಪಾಂ ತಾಂ ವನ್ದೇ ಗೌರೀಂ ಸದಾಶಿವಾಮ್ || ೨೧ ||

ವಿಷ್ಣುಪತ್ನೀಂ ಮಹಾಲಕ್ಷ್ಮೀಂ ಕ್ಷೀರಸಾಗರಸಮ್ಭವಾಮ್ |

ಭಾರ್ಗವೀಂ ವಾರುಣೀಂ ದಿವ್ಯಾಂ ಚಞ್ಚಲಾಂ ಚಂದ್ರಸೋದರೀಮ್ || ೨೨ ||

ಅಷ್ಟಲಕ್ಷೀಸ್ವರೂಪಾಂ ತಾಂ ಪದ್ಮಸಂಸ್ಥಾಂ ಮಹಾಲಸಾಮ್ |

ಧನಧಾನ್ಯಪ್ರದಾಂ ರಾಮಾಂ ಶ್ರೀಂ ಹ್ರೀಂ ವಿಷ್ಣುಪ್ರಿಯಾಂ ಶುಭಾಮ್ || ೨೩ ||

ನಾರಾಯಣೀಂ ಮಹಾದೇವೀಂ ವೈಷ್ಣವೀಂ ಪೂಜಯಾಮ್ಯಹಮ್ |

ಸಕಲೈಶ್ವರ್ಯವೃದ್ಧ್ಯರ್ಥಂ ಶಾನ್ತಿತುಷ್ಟಿಪ್ರದಾಯಿನೀಮ್ || ೨೪ ||

ಸರಸ್ವತೀಂ ಬ್ರಹ್ಮಪತ್ನೀಂ ವಿದ್ಯಾಬುದ್ಧಿಪ್ರದಾಯಿನೀಮ್ |

ಹಂಸಾಸನಾಂ ಪದ್ಮಪೀಠಾಂ ಶಾರದಾಂ ವೇದಮಾತರಮ್ || ೨೫ ||

ವೀಣಾಪಾಣೀಮಕ್ಷಮಾಲಾಪುಸ್ತಕಾದಿವಿಭೂಷಿತಾಮ್ |

ಶ್ವೇತವರ್ಣಾಂ ಶ್ವೇತವಸ್ತ್ರಾಂ ಗಾಯತ್ರೀಂ ಪೂಜಯಾಮ್ಯಹಮ್ || ೨೬ ||

ಸರ್ವಜ್ಞಪೀಠಸಂಸ್ಥಾಂ ತಾಂ ಕಾಶ್ಮೀರಪುರವಾಸಿನೀಮ್ |

ಸದ್ವಿದ್ಯಾಕಾವ್ಯಸಿದ್ಧ್ಯರ್ಥಂ ಪ್ರಪದ್ಯೇ ಜಗದಮ್ಬಿಕಾಮ್ || ೨೭ ||

ಕೃಷ್ಣದ್ವೈಪಾಯನಂ ವನ್ದೇ ಚತುರ್ವೇದವಿಶಾರದಮ್ |

ವೇದವ್ಯಾಸಂ ವಿಷ್ಣುರೂಪಂ ಪುರಾಣೋಪಪುರಾಣದಮ್ ||೨೮ ||

ಋಚಃ ಪೈಲಾಯ  ವೈಶಂಪಾ | ಯನಾಯ ಯಜುರೇವ ಚ |

ಜೈಮಿನಯೇ ತು ಸಾಮಾನಿ ತಥಾऽಥರ್ವಂ ಸುಮನ್ತವೇ || ೨೯ ||

ವ್ಯಸ್ಯ ವೇದಾನ್ ದತ್ತವಾನ್ಯಸ್ತಸ್ಮೈ ವ್ಯಾಸಾಯ ವನ್ದನಮ್ |

ಗುರವೇ ಸರ್ವವಿದ್ಯಾನಾಂ ಪಾರಾಶರ್ಯಾಯ ತೇ ನಮಃ || ೩೦ ||

(ಶಕ್ವರೀಚ್ಛನ್ದಃ—  ವಸನ್ತತಿಲಕಾವೃತ್ತಮ್)

ಯಃ ಸ್ವಾನುಭಾವಮಖಿಲಶ್ರುತಿಸಾರಮೇಕ-

ಮಧ್ಯಾತ್ಮದೀಪಮತಿತಿತೀರ್ಷತಾಂ ತಮೋऽನ್ಧಮ್ |

ಸಂಸಾರಿಣಾಂ ಕರುಣಯಾऽऽಹ ಪುರಾಣಗುಹ್ಯಂ

ತಂ ವ್ಯಾಸಸೂನುಮುಪಯಾಮಿ ಗುರುಂ ಮುನೀನಾಮ್ || ೩೧ ||

(ಭಾಗ.ಪು.— ಸ್ಕಂ.೧.ಅ.೨.ಶ್ಲೋ.೩)

(ಅನುಷ್ಟುಬ್-ವೃತ್ತಮ್ )

ಸರ್ವೇಶ್ವರಸಮಾರಮ್ಭಾಂ ಭಗವತ್ತತ್ತ್ವಬೋಧಿಕಾಮ್ |

ಅಸ್ಮದಾಚಾರ್ಯಪರ್ಯನ್ತಾಂ ವನ್ದೇ ಗುರುಪರಮ್ಪರಾಮ್ || ೩೨ ||

ಯಸ್ಯಾವತಾರೋ ಭೂತಾನಾಂ ಕ್ಷೇಮಾಯ ಚ ಭವಾಯ ಚ |

ಸರ್ವೇಶ್ವರಸ್ಯ ತಸ್ಯೈವ ತತ್ತ್ವರತ್ನಾನಿ ಯತ್ನತಃ || ೩೯ ||

ತತ್ಕೃಪಾಚೋದನಾದ್ಧ್ಯೇವ ಸಂಗೃಹ್ಣಾಮಿ ತದರ್ಪಣೇ |

ಸೋತ್ಸಾಹೋऽಸ್ಮಿ ಜಲಂ ಕೂಪೇ ಕೂಪಸ್ಯೇವ ಸಮಾಗಮಃ || ೩೩ ||

ಕೋ ವಾ ಭಗವತಸ್ತಸ್ಯ ಪುಣ್ಯಶ್ಲೋಕೇಡ್ಯಕರ್ಮಣಃ |

ಶುದ್ಧಿಕಾಮೋ ನ ಶೃಣುಯಾದ್ಯಶಃ ಕಲಿಮಲಾಪಹಮ್ || ೨೪ ||

(ಭಾಗ.ಪು.— ಸ್ಕಂ.೧.ಅ.೧.ಶ್ಲೋ.೧೬)

ಆಪನ್ನಃ ಸಂಸೃತಿಂ ಘೋರಾಂ ಯನ್ನಾಮ ವಿವಶೋ ಗೃಣನ್ |

ತತಃ ಸದ್ಯೋ ವಿಮುಚ್ಯೇತ ಯದ್ಬಿಭೇತಿ ಸ್ವಯಂ ಭಯಮ್ || ೩೫ ||

(ಭಾಗ.ಪು.— ಸ್ಕಂ.೧.ಅ.೧.ಶ್ಲೋ.೧೪)

---